【Back-to-School備忘 — 小學篇】

話咁快暑假就到尾聲喇，家長同小朋友都要為Back to School做好預備，對於9月先正式喺溫尼伯入學嘅小朋友，有D乜嘢要準備呢？

• 文具：如果學校要求學生自行購買的話，通常會開學前派張Checklist比你，一般已經可以係Superstore、Walmart、Staple、Dollarama等買到；另外，有D學校會代為購買，每年收取約CA$30費用，小朋友開學就會收到，啲文具係留係學校用，唔洗攞返屋企

• 水樽﹕小朋友返足全日，一個大水樽不可少

• 食物盒及食物袋﹕呢度嘅Lunch Hour一般30分鐘，Local小朋友通常會帶light lunch，即三文治之類

• 零食﹕返全日的話，通常會有2個Snack Time，記得預備足夠嘅Snacks比小朋友呀（帶Nut-free及最好 Egg-free 嘅Snacks，因為外國小朋友，有食物敏感嘅情況相對普遍。）

• 室內鞋﹕小朋友進入學校，需要換上一對室內鞋，普通一對著得舒服嘅波鞋就可以，對室內鞋可以放喺學校，放假先攞返屋企。

• 後備衫褲、底底、襪（K – Gr1小朋友）/ 高年級嘅小朋友，學校可能要求準備一套運動服更換

☃️ 冬季額外預備的物資﹕

• 冷帽、防水手套﹕幾凍都好，小朋友每個Recess都會出室外玩

• 手套扣（Elastic Mitten Clip）﹕將手套同外套扣住，低年級小朋友建議選擇一條過頸的長款手套扣，可以穿過外套裡面，減低小朋友唔見手套的機會

• 頸巾 / 頸套（Neck Warmer）﹕頸套好處係小朋友自己戴同玩嘅時候方便D

• 雪褸、雪褲、雪鞋﹕必需品，小朋友返學時，通常未可以即時入學校，要係戶外等一段時間（除非天氣太凍或雨天），大約上課前10分鐘先一齊入課室

• 暖水壺﹕小息喺室外玩完，入到課室可以暖返下

💦溶雪時要預備的衣物﹕

➡️ 溫馨提示﹕記得幫小朋友嘅所有物資寫好名啊！

小朋友D禦寒衣物咁多，學校內有暖氣，咁佢哋D嘢放邊？

1. 小朋友入到學校，會先除咗雪鞋換上室內鞋，再入課室
2. 入到課室，雪褸、雪褲就可以掛係自己位
3. 其他就放櫃桶或自己書包
4. 一到小息，小朋友就會自己著返所有禦寒衣物，直奔室外

小朋友室內要著咩？

• 普通長褲﹕女孩子可以著Legging，儘量唔好絨毛，室內有暖氣會好熱，總之方便佢哋笠返條雪褲出去玩
• 普通長袖衫﹕如果太凍，可以底一件薄長袖，外面再加一件厚少少的，方便小朋友可加可減

🌟額外小貼士🌟﹕

如果小朋友第一次喺溫尼伯返學，以下少少Tips希望可以幫到各位家長﹕

• 可以同學校Admin預先講聲，睇下可唔可安排Buddy比小朋友，小朋友有事可以問Buddy，例如﹕廁所係邊？教師室係邊？
• 如果怕小朋友英文唔好，可以問下學校有冇EAL (English as Additional Language) / ESL (English as Second Language)，幫小朋友enrol，EAL teacher會Group埋其他EAL嘅小朋友，同佢哋講故事同玩遊戲
• 教小朋友一D同其他人溝通嘅簡單英文： Can we play together?
• 學校有好多不同的 Special Day，例如﹕Crazy Hair Day、Pajama Day、Pink Day、Movie Night等。家長記得Mark低喺日曆，唔好錯過比小朋友參與其中的機會，有助佢哋增加歸屬感㗎！
• 報名參加家長義工，可以了解更多關於小朋友的學校生活、同學和老師。
• 如果係有信仰嘅，開學前可以每晚為小朋友禱告
• 最緊要係比小朋友知道，爸爸媽媽會同佢一齊踏出勇敢嘅第一步！

㊗️ 祝福各位爸爸媽媽及小朋友開學順利 ！